Home / Գլխաւոր լուրեր / Նախագահ Միշէլ Աուն Ընդունեց Շնորհաւորական Ժողովրդային Այցելութիւններ, 6 Նոյեմբեր, 2016
14937177_10154804004582125_6506424283941182925_n

Նախագահ Միշէլ Աուն Ընդունեց Շնորհաւորական Ժողովրդային Այցելութիւններ, 6 Նոյեմբեր, 2016

Լիբանանցիներու հսկայ բազմութիւն մը կիրակի, 6 նոյեմբեր 2016-ի առաւօտեան կանուխ ժամերէն սկսեալ ուղղուեցաւ դէպի նախագահական պալատ, որու մուտքին ժողովուրդը դիմաւորուեցաւ «Ժողովուրդին տուն»-ը պաստառով, լիբանանեան դրօշակներով, ազգային երգերով եւ զօր. Աունի նուիրուած յատուկ կանչերով: Ծովածաւալ այդ քայլարշաւին ընթացքին լիբանացիք կը վերյիշէին իրենց անցեալը, յատկապէս՝ 1989-ի եւ 1990-ի դէպքերը:
Այդ օրերու դէպքերը վերյիշելով եւ ձիթենիի ճիւղերով լիբանանցիք իրենց զօրակցութիւնը արտայայտեցին նորընտիր նախագահին:
Անոնք խոր յուզումով հետեւեցան նախագահ Միշէլ Աունի, որ պալատի շրջափակին մէջ հաւաքուած բազմահազար քաղաքացիները ողջունեց «Ո՛վ Լիբանանի փառաւոր ժողովուրդ» արտայայտութեամբ: Նախագահ Աուն իր մատներով յաղթանակի նշանը պարզեց եւ հաստատեց, որ թէեւ 26 տարի առաջ այլ տարազով կ՛ողջունէր զանոնք, սակայն իր միտքը եւ խօսքը կը մնան նոյնը:
Նախագահը յայտնեց, որ իրենք նոյն վայրին մէջ հանդիպած են դժուար պայմաններու մէջ, սակայն միշտ ալ եղած են հպարտ եւ բարձր կորովով:
«Սակայն մեր բանակայիններէն շատեր նահատակուեցան, իսկ ոմանք անյայտ կորսուեցան. անոնք մեր սիրելիներն են, եւ չկայ ազգային առիթ մը, որուն ընթացքին անոնց յիշատակը չենք ոգեկոչեր: Այս հրապարակը երկու տարիներ շարունակ չլքեցինք, ամէնէն դժուար պայմաններուն ընթացքին, սակայն դժբախտաբար օրին միջազգային հսկայ խաղ մը յաղթեց մեզի եւ արտօնեց, որ ոչ լիբանանցի զինուորներ ներխուժեն մեր երկիրը», շեշտեց ան:
Նախագահ Աուն շեշտեց, որ երբ ինք ստանձնեց Լիբանանը, անիկա 20 կտոր էր, սակայն ինք լիբանանցիներուն դէմ չկռուեցաւ, իշխանութեան հասնիլը իր նպատակը չէր, այլ այդ պատերազմին պէտք էր իր իսկական իմաստը շնորհել եւ ընդգծել, որ անիկա ազատութեան, անկախութեան եւ գերիշխանութեան համար մղուած պատերազմ էր:
Ան շեշտեց, որ Պաապտայէն դուրս գալը խայտառակութիւն չէր, այլ պարտութիւն: «Մենք պալատէն դուրս եկանք, Լիբանանէն հեռացանք, սակայն հեռուէն գործեցինք եւ պայքարեցանք, մինչեւ որ զինեալ պայքարը աւարտեցաւ եւ սկսաւ խաղաղ պայքարը` ուսանողներուն ցոյցերով եւ 15 տարի շարունակ այդ ցոյցերուն ընթացքին գործուած բռնութիւնները մերժելով», ըսաւ ան:
Նախագահ Աուն շեշտեց, որ ոչ ոք կրնայ զիրենք զսպել, որովհետեւ ազատութիւնը իրենց համար բնածին արժէք է, զոր կը պահեն: «Այսօր մենք ճակատաբաց եւ արժանապատուութեամբ կրնանք ժողովուրդներուն դիմաց կանգնիլ, որովհետեւ մենք կերտած ենք մեր ազգային միասնականութիւնը: Իսկ այսօր մենք կը սկսինք երկրորդ փուլը, որ հայրենիքի կերտման փուլն է», ըսաւ ան:
Նախագահ Աուն ընդգծեց, որ հանրապետութեան նախագահ դառնալը նպատակ չէ, այլ նպատակը իր ազգային միասնականութեամբ հզօր հայրենիքի եւ հզօր պետութեան կերտումն է: «Հզօր պետութիւնը կարելի է կերտել սահմանադրութեան հիման վրայ, սահմանադրութիւն մը, որ կը յարգուի քաղաքական բոլոր անձնաւորութիւններուն կողմէ: Հետեւաբար չկայ մէկը, որ կրնայ խախտել սահմանադրութիւնը», ըսաւ ան:
Նախագահ Աուն շեշտեց, որ լիբանանցիները եւս պէտք է յարգեն օրէնքները, իսկ անոնց ապահովութեան պէտք է հսկեն ոչ քաղաքականացած ապահովութեան ուժեր, որոնց առաքելութիւնն է կարգի ու կանոնի գործադրութեան հսկել:
Ան հաստատեց, որ լիբանանցիներուն համար ամէնէն առաջ պիտի ապահովուին ջուրի եւ ելեկտրականութեան ծառայութիւնները, ինչպէս նաեւ ճամբաներու շինութիւնը:
«Իշխանութեան բարգաւաճման ծրագիր գոյութիւն ունի, եւ մենք որեւէ օտար երկրի պարտական պիտի չըլլանք: Աշխատանքի կամքն ու կորովը առկայ են: Արտաքին աշխարի երկիրներուն հետ մեր յարաբերութիւնը պիտի ըլլայ բարեկամական, եւ վերջ պիտի տանք արտաքին հոգատարութեան տրամաբանութեան: Փտածութիւնը արմատախիլ պիտի ըլլայ, իսկ կենսոլորտը ամէն գնով պիտի դառնայ մաքուր, եւ այս գծով Ժողովուրդին պատասխանատուութիւնը եւս մեծ է» եզրափակեց նախագահ Աուն:

Leave a Reply

Your email address will not be published. Required fields are marked *