Home / Գլխաւոր լուրեր / Հայկական Բանակի Հիմնադրութեան 25-ամեակի Նշում՝ ՖԻՆԻՒԼ-ի Իտալական Զօրանոցին մէջ, Լիբանանեան, յունուար, 30, 2017
aghotk_12817

Հայկական Բանակի Հիմնադրութեան 25-ամեակի Նշում՝ ՖԻՆԻՒԼ-ի Իտալական Զօրանոցին մէջ, Լիբանանեան, յունուար, 30, 2017

Հայկական բանակի հիմնադրութեան 25-ամեակը յատուկ արարողութեամբ նշուեցաւ Հարաւային Լիբանանի մէջ: Այս առիթով 2014-էն ի վեր ՖԻՆԻՒԼ-ի իտալական զօրանոցին մէջ ծառայող հայկական ուժերը, ինչպէս նաեւ Լիբանանի մէջ Հայաստանի դեսպան Սամուէլ Մկրտչեան, Մերձաւոր Արեւելքի մէջ Լեռնային Ղարաբաղի Հանրապետութեան մնայուն ներկայացուցիչ Կարօ Քեպապճեան եւ խումբ մը լիբանանահայեր հարաւի Շամաա գիւղին մէջ մասնակցեցան պաշտօնական հանդիսութեան եւ իրենց բարեմաղթութիւնները փոխանցեցին զինուորներուն, աւելի ուշ անոնց հետ կիսելով օրհնուած հացը:
Հանդիսութեան ներկայ գտնուեցան նաեւ հարաւային Լիբանանի մէջ տեղակայուած ՖԻՆԻՒԼ-ի խաղաղապահ ուժերու առաքելութեան մաս կազմող այլ երկիրներու ներկայացուցիչներ, ինչպէս նաեւ ՄԱԿ-ի մէջ գործող հայ բարձրաստիճան պաշտօնեաներ:
Պաշտօնական հանդիսութիւնը տեղի ունեցաւ ՖԻՆԻՒԼ-ի արեւմտեան զօրանոցին մէջ: Ձեռնարկը սկսաւ Լիբանանի եւ Հայաստանի զոյգ քայլերգներու յոտնկայս ունկնդրութեամբ եւ Լիբանանի, Հայաստանի հանրապետութեան եւ ՄԱԿ-ի դրօշակներուն տողանցքով:
Ապա ՖԻՆԻՒԼ-ի միջազգային խաղաղապահ ուժերուն մաս կազմող հայկական 5-րդ ջոկատը` գլխաւորութեամբ ջոկատի հրամանատար քափիթեն Կարէն Աթոյեանի, ողջունեց դեսպան Մկրտչեանը:
Մկրտիչ քհնյ. Քէշիշեան «Տէրունական աղօթք»-ով եւ պահպանիչով օրհնեց հայկական ջոկատն ու ներկաները:
Իսկ Դերգնդապետ Պորսերինի գնահատագիրներ յանձնեց խումբ մը հայ զինուորներու:
Նմանապէս՝ քափիթեն Աթոյեան ողջունեց ներկաները` երախտագիտութիւն յայտնելով, որ իրենց համար մեծ պատիւ է, որ այս առիթով անոնք կը գտնուին հայկական ջոկատի կողքին:
Քափիթեն Աթոյեան ողջունեց ներկաները` երախտագիտութիւն յայտնելով, որ իրենց համար մեծ պատիւ է, որ այս առիթով անոնք կը գտնուին հայկական ջոկատի կողքին:
«Հայաստանի Հանրապետութեան համար այսօր իւրայատուկ օր է: Այսօր բանակին օրն է եւ հայ զինուորին օրը: Ան ներկաներէն խնդրեց, մէկ վայրկեան յոտնկայս յարգել նահատակ զինուորներուն յիշատակը: Իր ողջոյնի խօսքով քափիթեն Աթոյեան 1992-ին հիմնուած հայոց բանակին 25-ամեակին առիթով շնորհաւորեց ներկաները:
Այս առթիւ հայկական զօրամասի զինուորներուն ուղղելով իր խօսքը, դեսպան Սամուէլ Մկրտչեան ըսաւ. «Ձեր նախորդները, ծառայող բոլոր զինուորները, որոնք դրած են բանակին հիմքը, իրենց առաքելութեան սկսած են Հայաստանի անկախութեան հռչակման առաջին օրերէն իսկ: Անոնք մարտնչած են հայ ժողովուրդի դարերով երազած նպատակներուն համար, ազատութեան ձեռքբերումին համար եւ ի վերջոյ կրցած են ձեւաւորել հայոց բանակի հիմքերը: Այդ բանակը կը շարունակէ ծառայել մեր ժողովուրդին, մեր պետութեան անկախութեան եւ տարածքային ամբողջականութեան պաշտպանութեան ու համազգային նպատակներու իրականացման:
«Սակայն անկախ այդ առաքելութենէն, հայոց բանակը գիտակցած է նաեւ, որ միայն հայրենիքի սահմանները պահպանելով չէ հայ զինուորին առաքելութիւնը, այլ` անհրաժեշտ է ամրապնդուիլ ու ծառայել աւելի լայն նպատակներու իրագործման համար:
«Այդ որոշումը տրուեցաւ, եւ հայոց բանակի խաղաղապահ զօրամասերը ստանձնեցին միջազգային զինուորական առաքելութիւն, եւ իբրեւ այդպիսին իրենց մասնակցութիւնը բերին ՄԱԿ-ի խաղաղապահ ուժերուն: Այս շրջագիծին մէջ, հայկական ուժերը 2004-ին ծառայեցին Քոսովոյի մէջ, ապա Աֆղանիստանի, իսկ այսօր կը ծառայեն նաեւ հարաւային Լիբանանի մէջ», յայտնեց դեսպան Մկրտչեան:
Ան բարձր գնահատեց միջազգային խաղաղապահ ուժերուն առաքելութիւնը` նշելով, որ աւելի ազնիւ գործ չկայ, քան երկրի մը եւ ժողովուրդի մը խաղաղութեան ապահովումը, աւելցնելով, որ հայոց բանակը ՖԻՆԻՒԼ-ի ուժերուն շրջագիծին մէջ կը ծառայէ ի խնդիր այդ ազնիւ նպատակի իրագործման:
«Անփորձանք մնացէ՛ք եւ ծառայեցէ՛ք ի խնդիր Լիբանանի խաղաղութեան եւ ժողովուրդի կայուն բարգաւաճման ու զարգացման», շնորհաւորեց դեսպանը հայկական զօրամասին:
Սամուէլ Մկրտչեան շնորհաւորեց զօրախումբին անդամները` անոնց մաղթելով ուժ եւ կորով. ան ընդգծեց, որ վերջերս ՖԻՆԻՒԼ-ի ուժերու հրամանատար զօր. Մայքըլ Պիրիի կողմէ հայոց բանակին 25-ամեակին առիթով յղուած շնորհաւորագիրի մը մէջ հաստատուած է, թէ հայ զինուորները մասնագիտական պատրաստուածութեամբ գնահատելի աշխատանք կը տանին ՖԻՆԻՒԼ-ի ուժերուն ծառայութեան շրջագիծին մէջ:
Ան մաղթեց, որ հայկական զօրամասը իր ծառայութիւնը նոյն ձեւով կը շարունակէ` բարձր պահելով Հայաստանի Հանրապետութեան եւ հայոց բանակի պատիւն ու վարկը: «Անվտանգ ծառայութիւն եւ բոլորիդ վարձքը կատար», եզրափակեց դեսպան Մկրտչեան:
Ապա դեսպանը շնորհակալագիրներ եւ պարգեւներ յանձնեց ՖԻՆԻՒԼ-ի արեւմտեան զօրանոցի հրամանատար գնդապետ-զօրավար Ուկօ Չիլլոյի, լիբանանեան բանակի յարաբերականի ներկայացուցիչ գնդապետ Ֆատի Ըսթֆենի եւ մարտական գործողութիւններու աջակցող գումարտակի հրամանատար դերգնդապետ Իվանօ Պորսերինիի:
Դեսպան Մկրտչեան գնահատագիրներ յանձնեց նաեւ քափիթեն Կարէն Աթոյեանի, քափիթեն Կարուշ Նահապետեանի, ենթասպայ Կարէն Գաբոյեանի, յիսնապետ Արմէն Պօղոսեանի եւ յիսնապետ Նուէր Ազարեանի:
Ապա ՖԻՆԻՒԼ-ի արեւմտեան զօրանոցի պատասխանատու գնդապետ Լիպօ Չանքարելլօ գնահատագիր մը յանձնեց քափիթեն Կարէն Աթոյեանի:
Իր կարգին, դերգնդապետ Իվանօ Պորսերինի գնահատագիրներ յանձնեց խումբ մը հայ զինուորներու:
Ապա ընթերցուեցաւ հայոց բանակի խաղաղապահ ուժերու հրամանատար հազարապետ-զօրավար Արթուր Սիմոնեանի ողջոյնի խօսքը, ինչպէս նաեւ անոր յղած գնահատագիրները յանձնուեցան հայկական զօրախումբին մէջ ծառայող կարգ մը զինուորներու:
Պաշտօնական ձեռնարկի աւարտէն ետք ցուցադրուեցաւ Հայաստանի մասին տեսերիզ մը, որ մեծ հետաքրքրութիւն ստեղծեց սրահին մէջ գտնուող օտար երկիրներու ներկայացուցիչներուն մօտ:
Ապա տեղի ունեցաւ հայկական աւանդական ճաշերու հիւրասիրութիւն, որ պատրաստուած էր խումբ մը լիբանանահայերու կողմէ, իսկ աւելի ուշ դեսպան Մկրտչեան եւ քափիթեն Աթոյեան հատեցին բանակի 25-ամեակին նուիրուած կարկանդակը:
32 զինուորներէ բաղկացող հայկական զօրախումբի անդամները երգեցին ազգային երգեր եւ շուրջպար պարեցին ներկաներուն հետ:

Leave a Reply

Your email address will not be published. Required fields are marked *