Home / Գլխաւոր լուրեր / Շամաայի Մէջ. ՖԻՆԻՒԼ-ի Հայկական Զօրամասերու Հերթափոխութեան Արարողութիւն, Լիբանանեան, դեկտեմբեր,1, 2016
a11_113016

Շամաայի Մէջ. ՖԻՆԻՒԼ-ի Հայկական Զօրամասերու Հերթափոխութեան Արարողութիւն, Լիբանանեան, դեկտեմբեր,1, 2016

Շամաայի Մէջ. ՖԻՆԻՒԼ-ի Հայկական Զօրամասերու Հերթափոխութեան Արարողութիւն

28 նոյեմբերին հարաւային Լիբանանի Շամաա բնակավայրին մէջ տեղակայուած ՖԻՆԻՒԼ-ի կեդրոնին մէջ տեղի ունեցաւ հայկական զօրախումբերու հերթափոխութեան պաշտօնական արարողութիւնը:
Մինչեւ արարողութեան սկիզբը, Լիբանանի մէջ Հայաստանի դեսպան Սամուէլ Մկրտչեան հանդիպում մը ունեցաւ խաղաղապահ ուժերու առաքելութեան «Արեւմտեան հատուած»-ի նոր հրամանատար գնդապետ-զօրավար Հիւկօ Չիլլոյի հետ: Հանդիպումին ընթացքին զրուցակիցները քննարկեցին հայ խաղաղապահներու եւ իտալական հրամանատարութեան միջեւ գործակցութեան, Հայաստանի զինեալ ուժերու խաղաղապահ կարողութիւններու ստեղծման, ինչպէս նաեւ Քոսովոյի եւ Աֆղանիստանի մէջ խաղաղապահ առաքելութիւններուն Հայաստանի Հանրապետութեան աշխուժ ներգրաւուածութեան վերաբերող հարցեր:
Պաշտօնական արարողութեան ընթացքին ծառայութիւնը աւարտած հայ խաղաղապահներու 4-րդ զօրախումբի հրամանատար, հազարապետ Տիգրան Սահակեան իր լիազօրութիւնները փոխանցեց Լիբանան հասած 5-րդ զօրախումբի հրամանատարին` հարիւրապետ Կարէն Աթոյեանի: Արարողութեան ընթացքին խօսքեր արտասանեցին կեդրոնի հրամանատար, գնդապետ-զօրավար Չիլլոն եւ հայ խաղաղապահներու 4-րդ զօրախումբի հրամանատար, հազարապետ Տիգրան Սահակեանը:
Գնդապետ-զօրավար Չիլլօ շնորհակալութիւն յայտնեց հայ խաղաղապահներուն` բարեխիղճ եւ բարձր մակարդակով ծառայելու համար: Ան գնահատեց անոնց կարգապահութիւնը եւ ծառայողական հմտութիւնները:
Չիլլօ շնորհաւորեց տուն վերադարձող հայ խաղաղապահները եւ բարի ծառայութիւն մաղթեց պարտականութիւնները ստանձնող նոր զօրախումբին: Հանդիսութիւնը եզրափակուեցաւ հայ խաղաղապահներու 4-րդ զօրախումբի զինուորներուն պարգեւատրումով:
Դեսպան Սամուէլ Մկրտչեան եւ գնդապետ-զօրավար Չիլլօ ՄԱԿ-ի յատուկ մետալներ յանձնեցին հայ զինուորներուն` անոնց առաքելութիւնը յաջող աւարտելու առիթով:
Յանձնումի եւ ստանձնումի այս արարողութեան ներկայ էին նաեւ զինաւանի սպայական անձնակազմը, Լիբանանի մէջ Հայաստանի դեսպանատան անձնակազմը եւ նոյն կեդրոնին մէջ ծառայող այլ երկիրներու խաղաղապահ ուժեր:

Leave a Reply

Your email address will not be published. Required fields are marked *