Home / Գլխաւոր լուրեր / Քաթարցի Պատուիրակը Նախագահ Աունին Յայտնեց Լիբանանի Նկատմամբ Զօրակցութիւնը Եւ Անոր Յանձնեց Տոհա Այցելութեան Հրաւէր Մը, Լիբանանեան, նոյեմբեր, 24, 2016
aoun_qatar_112316

Քաթարցի Պատուիրակը Նախագահ Աունին Յայտնեց Լիբանանի Նկատմամբ Զօրակցութիւնը Եւ Անոր Յանձնեց Տոհա Այցելութեան Հրաւէր Մը, Լիբանանեան, նոյեմբեր, 24, 2016

Քաթարի շէյխ Թամիմ պըն Համատ Ալ Թանի իշխանի յատուկ պատուիրակ, արտաքին գործոց նախարար Մոհամետ պըն Ապտել Ռահման Ալ Թանի 23 նոյեմբերին, ՝պաշտօնական այցելութիւն մը տուաւ Լիբանան:
Ապտել Ռահման Ալ Թանի Պէյրութի միջազգային օդակայանէն ուղղուեցաւ Պաապտա, ուր ընդունուեցաւ հանրապետութեան նախագահ զօր. Միշել Աունի կողմէ:
Հանդիպումէն ետք քաթարցի պատուիրակը հաստատեց, որ նախագահ Աունին յանձնած է Տոհա այցելութեան հրաւէր մը` ուղղուած Թամիմ պըն Համատ Ալ Թանի իշխանին կողմէ:
Ապտել Ռահման Ալ Թանի շնորհաւորեց լիբանանցիները նախագահական ընտրութիւն կատարելու առիթով եւ մաղթեց, որ Լիբանանի նախագահական թափուր դրութեան աւարտը ըլլայ առիթ մը երկրին վերադարձնելու իր ապահովական կայունութիւնը, ինչպէս նաեւ կազմելու երկրին կառավարութիւնը, որպէսզի երկիրը իր բնականոն հունին մէջ մտնէ:
Ան շեշտեց, որ լիբանանեան-քաթարեան յարաբերութիւնները պիտի շարունակուին, աւելցնելով, որ Քաթար մնայուն կերպով կը զօրակցի Լիբանանին:
Ապտել Ռահման Ալ Թանի այցելեց նաեւ Այն Թինէ, ուր ընդունուեցաւ խորհրդարանի նախագահ Նեպիհ Պըրրիի կողմէ:
Հանդիպումէն ետք քաթարցի պատուիրակը նշեց, որ Պըրրիին փոխանցած է Քաթարի իշխանին ողջոյնները:
Ան դարձեալ շնորհաւորեց լիբանանցիները` նախագահական ընտրութիւն կատարելու առումով, շեշտելով, որ նախագահական աթոռի թափուր դրութիւնը նման էր այն տագնապին, որ լուծուեցաւ Տոհայի համաձայնութեամբ:
«Մենք կը զօրակցինք լիբանանցիներուն, եւ Լիբանանին նեցուկ կանգնելու Քաթարի սկզբունքները հաստատ են», շեշտեց Ապտել Ռահման Ալ Թանի:
Ան մաղթեց, որ Լիբանան ամէնէն արագ միջոցին վերագտնէ իր կայունութիւնը:
Քաթարցի պատուիրակը այցելեց նաեւ Մուսայթպէ, ուր հանդիպում մը ունեցաւ ընթացաւարտ կառավարութեան վարչապետ Թամմամ Սալամի հետ:
Պուսթրոս պալատին մէջ Ապտել Ռահման Ալ Թանի հանդիպում մը ունեցաւ արտաքին գործոց նախարար Ժըպրան Պասիլի հետ:
Հանդիպումէն ետք տրուած մամլոյ միացեալ ասուլիսի մը ընթացքին Պասիլ յայտնեց, որ Քաթար մնայուն կերպով բարիք գործած է Լիբանանին, յատկապէս 2006-ի յուլիսեան պատերազմէն ետք, Տոհայի խորհրդաժողովին ընթացքին, ինչպէս նաեւ տնտեսական եւ նիւթական հսկայական օժանդակութիւններու ընդմէջէն:
Պասիլ նշեց, որ ապագային Լիբանանի եւ Քաթարի միջեւ գործակցութիւնը աւելի սերտ պիտի ըլլայ` նկատի ունենալով կազի եւ քարիւղի Լիբանանի հարստութիւնը եւ այդ մարզին մէջ Քաթարի փորձառութիւնը:
Ան աւելցուց, որ Ապտել Ռահման Ալ Թանիի հետ քննարկած է նաեւ լիբանանեան բանակը զինելու անհրաժեշտութիւնը, որպէսզի վերջինս կարենայ շարունակել ահաբեկչութեան դէմ իր պայքարը:
«Քննարկեցինք նաեւ սուրիացի գաղթականներուն տագնապը եւ շնորհակալութիւն յայտնեցինք Քաթարի ցուցաբերած հասկացողութեան համար, ինչպէս նաեւ անոր օժանդակութիւնը խնդրեցինք` գաղթականներու տունդարձին առումով», ըսաւ Պասիլ:
Պասիլ մաղթեց, որ Լիբանանի եւ Քաթարի միջեւ յարաբերութիւնները վերադառնան իրենց հեզասահ ընթացքին:
Իր կարգին, քաթարցի պատուիրակը հաստատեց, որ Տոհա բարձր կը գնահատէ ինքզինք շրջանի տագնապներէն զերծ կացուցելու Լիբանանի քաղաքականութիւնը:
Ան յոյս յայտնեց, որ կառավարութիւնը շուտով կազմուի եւ Լիբանան վերագտնէ իր տնտեսական կայունութիւնը, ինչպէս նաեւ դառնայ Ծոցի երկիրներուն զբօսաշրջութեան գլխաւոր կեդրոնը:
Ապտել Ռահման Ալ Թանի հաստատեց, որ Լիբանանի եւ Ծոցի երկիրներուն միջեւ յարաբերութիւնները ամրապնդելու առումով դրական շարժում գոյութիւն ունի:
Քաթարցի պատուիրակը այցելեց նաեւ վարչապետ Սաատ Հարիրիի, որ Կեդրոնական Պէյրութի իր բնակարանին մէջ ընթրիք մը սարքեց ի պատիւ Քաթարի արտաքին գործոց նախարարին:
Հանդիպումին ներկայ գտնուեցան ներքին գործոց նախարար Նուհատ Մաշնուք, ինչպէս նաեւ Հարիրիի խորհրդատուներ Պասեմ Սապաա, Ղաթթաս Խուրի եւ Նատեր Հարիրի:
Հանդիպումէն ետք Ապտել Ռահման Ալ Թանի Հարիրին ողջունեց նախագահ Աունի թեկնածութիւնը որդեգրելու իր յանդուգն քայլին համար, որովհետեւ այդ նախաձեռնութեան շնորհիւ կարելի եղաւ նախագահական թափուր դրութեան վերջ տալ:
Ան յոյս յայտնեց, որ Հարիրի մօտիկ ապագային յայտարարէ կառավարութեան նոր կազմը` աւելցնելով, որ պէտք է սահմանադրական հաստատութիւնները վերադարձնել իրենց աշխատանքներուն եւ աշխուժութեան:
«Մենք կը շարունակենք զօրակցիլ Լիբանանի կառավարութեան եւ յաջողութիւն կը մաղթենք Հարիրիին: Համոզուած ենք, որ Լիբանան պիտի ունենայ հզօր եւ արաբական երկիրներուն զօրակցող կառավարական կազմ մը», շեշտեց ան:
Իր կարգին, Հարիրի յայտնեց, որ Ծոցի երկիրներուն կողմէ Լիբանանի նկատմամբ առնուած քայլերը ցոյց կու տան, որ անոնց համար Լիբանան վերադարձը առկայ է: «Զօր. Միշել Աունը հանրապետութեան նախագահ ընտրելէ ետք Լիբանանի եւ լիբանանցիներուն նկատմամբ յոյս յայտնուեցաւ, իսկ Ծոցի երկիրներուն յոյս ներշնչուեցաւ, որ Լիբանան վերականգնելու կարողութիւն ունի», ըսաւ ան:

Leave a Reply

Your email address will not be published. Required fields are marked *